Shteti i fundit fashist në Evropë vazhdon t’i diskriminojë sportistët kosovarë

Shteti Spanjoll është shteti me regjimin politik fashist më të gjatë në Evropë, konkretisht deri në prag të viteve ’80 të shekullit të kaluar kur lideri i tyre Franko ndërron jetë. Si duket, shteti spanjoll s’po mund të lirohet akoma nga trashëgimia fashiste e të menduarit dhe vepruarit.

Për më tepër, përkrahja e politikave fashiste të Serbisë dikur dhe tashti për pasardhësit politik të Millosheviqit e Sheshelit, e vërteton katërcipërisht këtë trashëgimi spanjolle. Politikanët në Spanjë mund të quhen socialistë, social – demokratë, liberalë etj, por si duket trashëgimia fashiste është e rrënjosur thellë në qenien e tyre.

Pengesat politike që po ia shkaktojnë Republikës së Kosovës që nga shpallja e pavarësisë, me analogji të Katalonisë e Baskisë, mbase edhe mund të kuptohen, ndonëse të pa bazuara dhe pa mbështetje të fortë juridike, për faktin se edhe Kosova ishte element konstituiv i ish Federatës Jugosllave, sikur vendet tjera në ish Jugosllavi, tashmë shtete të pavarura, dhe si e tillë Kosova përmbyllte procesin e shpërbërjes së ish Jugosllavisë, gjë që e konfirmoi edhe Gjykata Ndërkombëtare e Drejtësisë. Por pse sportistët të diskriminohen? A duhet përzier patjetër sporti me politikën, ndonëse kjo shkel vlerat e parimet bazë të humanizmit, të drejtat njerëzore e vlerat e qytetërimeve perëndimore.

T’i kthehemi paradoksit. Këtë të dielë ka përfunduar kampionati i 24-t botëror i karatesë. Në ngjarjen e mbajtur në Madrid të Spanjës, Kosova mbeti pa medalje, por prapë rreth ekipit të Kosovës kishte zhvillime shqetësuese të natyrës politike që padyshim ndikojnë edhe në performancën e sportistëve kosovarë.

Shteti spanjoll nuk lejoi flamurin e Kosovës në sallën ku u zhvilluan garat e botërorit, ndërsa karateistët kosovarë në vend të shkurtesës “KOS”, në shpinë kishin shkurtesën WKF, përkatësisht inicialet e Federatës Botërore të Karatesë. Edhe në faqen zyrtare Kosova u prezantua me shkurtesën “WKF5”, shkruan sot koha ditore, përcjell Kabllogrami.

Kështu edhe njëherë karateistët kosovarë ishin të diskriminuar, përkatësisht nuk u trajtuan në mënyrë të barabartë me të tjerët.

Edhe pse do të duhej, madje me zë të lartë, nuk ka pasur ndonjë reagim publik nga Federata e Karatesë së Kosovës për trajtimin jo të barabartë të sportistëve të saj në kryeqendrën e Spanjës, ndërsa reagimet kanë munguar edhe nga Komiteti Olimpik i Kosovës dhe Ministria e Kulturës, Rinisë dhe Sportit. Ky trend i heshtjes, përuljes dhe mosreagimit duhet të ndërpritet. Duhet ngritur zëri duke kërkuar fuqishëm trajtim të barabartë. Mbase kjo do t’i ndihmonte edhe Spanjës të largohen nga mendësia e errët fashiste. / Mentor Bogaj /©kabllogrami.com/