Foto: Radio Evropa e Lirë - Greva në shkollat e Kosovës
Greva në Arsim po vazhdon, pa shenja se do të ndërpritet, derisa ata që po vuajnë janë nxënësit me prindërit e tyre që vijojnë mësimet në shkollat dhe institucionet publike në Kosovë. Derisa liderët institucionalë, deputetë, ministra etj, duket se fare s’po e qajnë kokën pasi që ata fëmijët i kanë sistemuar mirë nëpër shkolla private të shtrenjta dhe aty s’ka grevë, shkruan Kabllogrami.
Kryetari i SBASHK-ut, Rrahman Jasharaj tha se ka lëvizje dhe angazhime të shtuara nga institucionet e vendit, por nuk ka ndonjë ofertë konkrete që do të mundësonte ndërprerjen e grevës së mësimdhënësve.
Këshilli Qendror Grevist i Sindikatës së Bashkuar për Arsim, Shkencë dhe Kulturë /SBASHK/, kanë bërë të ditur për Radion Evropa e Lirë se ende nuk ka plotësim të kërkesave të mësimdhënësve dhe se greva po vazhdon në të gjitha nivelet arsimore.
“Ka angazhime nga institucionet e vendit, por ofertat e tyre janë të padefinuara dhe nuk ka përafërim me kërkesat tona. Ne i kemi bërë të ditur se qëndrimi i të punësuarve në arsim, minimumi i kërkesës sonë është ngritja e koeficientit në tërë sistemin arsimor në 30 për qind. Ne do të vazhdojmë grevën me këmbëngulësi deri në realizmin e kërkesës sonë”, tha Jasharaj.
Koeficienti i mësimdhënësve të arsimit fillor dhe të mesëm aktualisht, sipas SBASHK-ut, është 2 deri në 2.3 me pagë mesatare nga 420 deri në 440 euro, kurse kërkohet që ky koeficient të rritet në 2.6 respektivisht 3, që i bie paga të arrijë në rreth 650 euro.
Këshilli Qendror Grevist i Sindikatës së Bashkuar për Arsim, Shkencë dhe Kulturë, gjatë ditës së sotme kanë vizituar mësimdhënësit grevistë në disa komuna të Kosovës.
Si pasojë e grevës, procesi mësimor nga e hëna është ndërprerë në të gjitha nivelet publike, duke filluar nga institucionet parashkollore e deri tek institucionet e arsimit universitar.
Sipas të dhënave zyrtare në Kosovë, rreth 370 mijë është numri i nxënësve në institucionet e arsimit para-universitar, kurse 110 mijë është numri i përgjithshëm i studentëve. Ndërkaq numri i mësimdhënësve në nivel vendi llogaritet të jetë rreth 23 mijë.ReL /©Kabllogrami/