LVV zbulon emrat e 50 militantëve të AAK-së dhe PDK-së që më 2018 u punësuan në Telekom
Lëvizja Vetëvendosje thotë se pushteti përmes punësimeve partiake e ka sjellur buzë shkatërrimit Telekomin e Kosovës, bën të ditur Kabllogrami.
Lëvizja Vetëvendosje ka prezantuar emrat e më shumë se 50 militantëve partiakë të AAK-së dhe PDK-së, që u punësuan gjatë vitit 2018 në Telekomin e Kosovës, në mesin e të cilëve edhe bashkëshorti i Donika Kadaj-Bujupit dhe gruaja e deputetit Mërgim Lushtaku
Sipas LVV-së, ky pushtet qëllimshëm ka përdorur strategji që çuan në degradim teknik, si lidhja e kontratave të dëmshme dhe punësimet e paligjshme. Këto, sipas këtij subjekti politik, çuan në shkatërrimin e Telekomit, dhe tash po tentohet privatizimi i saj në mënyrë që të përfitojnë milionat nga ky proces.
Drejtuesi i komitetit për Komunikim Elektronik dhe Postar, Fatban Bunjaku dhe sekretari i Qendrës së Prishtinës, Valdrin Ahmeti në fjalët e tyre paraqitën me fotografi emrat e punësimeve të fundit arbitrare dhe partiake që po e thellojnë degradimin e këtij institucioni.
Telekomi i Kosovës është ndërmarrje strategjike për ekonominë dhe sigurinë e vendit. Pas luftës ndërmarrja u bë funksionale dhe fitim-prurëse.
“Në vitet e fundit ky regjim është angazhuar për shkatërrimin e Telekomit dhe krijimin e një krize artificiale financiare, në mënyrë që t’i krijojnë argumentet e tyre për privatizim dhe që përgjatë kësaj rruge të përfitojnë edhe vet financiarisht nga zhvatja e kësaj ndërmarrje”, ka thënë Bunjaku.
Vetëvendosje thotë se kriza u krijua qëllimshëm përmes degradimit teknik, kontratave të dëmshme ku ajo me Z-Mobile është vetëm maja e “Asjsbergut”. “Punësimet partiake janë skemë kriminale për të cilat do të duhej të fillonin hetimet. Ndërkohë, funksionimi i auditimit të brendshëm në këtë kompani është paralizuar. Në krye të këtij funksioni është gruaja e deputetit të PDK-së – Mërgim Lushtaku, e cila prej emërimit në dhjetor të vitit të kaluar më shumë nuk vjen në punë”, argumenton LVV-ja.
Aktivisti Valdrin Ahmeti tregoi të dhënat e fundit të punësimeve të militantëve partiakë të koalicionit në pushtet, dhe pasojat që po sjellin ato në keq funksionimin e Telekomit.
“Vetëm në vitin 2018 në Telekom janë punësuar mbi 200 persona që i bie rritje prej 8.5% e numrit të përgjithshëm të punëtorëve të kësaj kompanie. Prej këtyre 200 punëtorëve mbi 100 janë të regjistruar si agjent të shitjes në këtë kompani. Më e rënda është që gjatë vitit 2018 në bazë të publikimit të ARKEP (Autoritetit Rregullativ të Komunikimeve Elektronike dhe Postare) nr.04/2018 thuhet se gjatë vitit 2018 edhe sipas të hyrave edhe sipas përdoruesve Telekomi i Kosovës ka shënuar rënie. Tek përdoruesit nga 56% e tregut në fund të vitit 2017 në 50 % e tregu në fund të 2018-tës. Ndërsa nga të hyrat nga 55.5% e tregut në fund të vitit 2017 në 52.2% të tregut në fund të vitit 2018”, tha Valdrin Ahmeti.
Në përfundim të fjalës Ahmeti listoi me emra dhe fotografi lidhjet familjare e partiake të të punësuarve të vitit të fundit në Telekomin e Kosovës. /©Kabllogrami/